Dr. Edward Hosea afungua mkutano Arusha kuhusu changamoto za tatizo la rushwa africa

Tweeted this Like this, be the first of your Friends

Bodi ya ushauri ya masuala ya rushwa Afrika inakutana kwa wiki nzima jijini Arusha hivi karibuni ili kuandaa taarifa ya hali ya rushwa itakayowasilishwa katika mkutano wa Wakuu wa nchi za Umoja wa Afrika(AU) utakaofanyika mwanzoni mwa mwezi ujao Adis Ababa Ethiopia.

Bodi hiyo pamoja na mambo mengine,itapitia kwa mapana changamoto za rushwa katika nchi wanachama wa AU, sanjari na kutathmini nchi mojamoja katika maeneo yanayolalamikiwa mara kwa mara,ikiwa ni pamoja na rushwa katika uwekezaji,huduma za jamii,na matukio ya rushwa katika chaguzi na siasa ambayo yanatajwa kuwa chanzo cha migogoro barani Afrika.

Dk.Edward Hosea ambae ni mkurugenzi wa taasisi ya kuzuia na kupambana na rushwa (TAKUKURU) ,ametoa takwimu za kushtua zinazoonyesha hali halisi ya wizi wa fedha za umma na rushwa katika nchi za Afrika ambazo hutoroshwa kila mwaka na kuhifadhiwa katika nchi zilizoendelea. Amesema kiasi cha Dola bilioni 148 hutoroshwa kutoka Afrika kwenda nchi za ughaibuni kila mwaka kwa sababu ya Rushwa.

Hata hivyo,Mkurugenzi huyo amesema nchi zilizoendelea ambazo mabenki yake yanahifadhi fedha hizo,zinawajibika katika kuhakikisha fedha hizo zinarejeshwa katika nchi zinakoibwa.

Wakati huo huo,Dk.Hosea amesema wakuu wa nchi za Umoja wa Afrika katika mkutano uliopita,waliteua jiji la Arusha Tanzania kuwa makao makuu ya Bodi ya Ushauri wa masuala ya rushwa barani Afrika na kwamba serikali ya Tanzania tayari imetoa eneo ka ajili ya ujenzi wa makao makuu hayo na kinachosubiriwa ni kuona serikali imetenga kiasi gani  kwa ajili ya ujenzi huo.

Wataalamu mbalimbali wamealikwa kuwasilisha mada katika kikao hicho cha maandalizi,ili kuwawezesha wajumbe wa bodi hiyo kupata uzoefu wa hali na mazingira ya rushwa katika nyanja mbalimbali,huku mtoa mada wa kwanza akiwa ni Mtanzania Jaji Augustin Ramadhani kutoka mahakama ya Afrika ya haki za binadamu.