Kikosi cha timu ya Taifa Hispania bajeti ya Wizara Michezo miaka 31

Tweeted this Like this, be the first of your Friends

KIKOSI cha timu ya Taifa Hispania, kinaongoza orodha ya timu za taifa zinazoundwa na wachezaji bora na wenye thamani kubwa katika fainali za Kombe la Mataifa ya Ulaya zinazoendelea nchini Poland na Ukraine.
Wachezaji 23 wanaounda kikosi hicho kilichotinga hatua ya nusu fainali, kina thamani ya pauni 579.7 milioni (Sh1.4 Trilioni), ambazo ni sawa na bajeti ya Wizara ya Habari, Utamaduni na Michezo kwa kipindi cha miaka 31.
Kwa kipindi cha mwaka 2010/2011, wizara hiyo ilitengewa fungu la Sh18.7 Bilioni, ambazo kati ya hizo, Sh14.2 Bilioni zilikuwa kwa ajili ya matumizi na Sh4.4 Bilioni zilitengwa kwa ajili miradi ya Maendeleo.
Thamani ya kikosi hicho ni sawa pia na bajeti ya mwaka mzima ya Wizara ya Elimu, ambayo ni Sh1.2 Trilioni bila kubadilika kwa viwango vya kubadilisha pesa za kigeni.
Katika taarifa yake, Transfermarkt imetoa mchanganuo unaoonyesha wastani wa thamani ya kila mchezaji, ambayo ni pauni 25.2 milioni (Sh60.2 Bilioni), isipokuwa Andres Iniesta, ambaye peke yake ametajwa kuwa na thamani ya pauni 57 milioni (Sh137 Bilioni), sawa na bajeti ya mwaka mzima ya Wizara ya Mambo ya Nje.
Hata hivyo thamani ya Iniesta (28), haina mjumuisho na ada ya uhamisho kwa vile yuko Barcelona kwa miaka 16. Cristiano Ronaldo wa Ureno ndiye mchezaji mwenye thamani kubwa kuliko wote Euro 2012, akitajwa kuwa na thamani ya Sh191.1 Bilioni.
Kikosi cha Ujerumani kiko nafasi ya pili kikiwa thamani ya Sh977.6 Bilioni, huku kila mchezaji akiwa na wastani ya Sh42.2 bilioni.
England inafuatia Sh 834.8 Bilioni na wastani wa thamani ya kila mchezaji Sh36.2 Bilioni, Ufaransa Sh723.5 na Ureno Sh716.2 Bilioni. Wastani wa thamani ya kila mchezaji Sh31.2 Bilioni.
Katika orodha ya 5-bora, timu tatu zimevuka kucheza hatua ya nusu fainali, ambazo ni Ujerumani, Ureno na Hispania, huku Ufaransa na England zikiishia hatua ya robo fainali.