FIRST 11 YA YANGA SASA HEWANI

Tweeted this Like this, be the first of your Friends

WAKATI Yanga ikiwa katika hatua za mwisho za kukamilisha usajili kwa ajili ya msimu ujao, suala la namba katika kikosi cha kwanza ‘First 11’ ndiyo tatizo.
Baada ya mazoezi ya takribani wiki moja, tayari kikosi cha kwanza kimeanza kujipanga huku baadhi ya namba zinaonekana zitakuwa na utata mkubwa kutokana na viwango vya wachezaji wake.
Mashabiki wanaohudhuria mazoezi ya Yanga kwenye Uwanja wa Kaunda wamekuwa wakijaribu kupanga vikosi vyao bila ya mafanikio.
Lakini hata kama Yanga itamchukua Kocha, Tom Saintfiet raia wa Ubelgiji, hawezi kukikwepa kikosi kitakachochambuliwa hapa chini.
Inaonekana ni ushindani mkali kati ya wachezaji waliokuwepo awali na wale wapya huku kila mchezaji akijitahidi kupambana ili apate nafasi bila ya kujali ni mgeni, mwenyeji, mkongwe au chipukizi.
Sasa Yanga inafanya mazoezi chini ya kocha Fred Felix Minziro na juzi aligawanya vikosi ambavyo huenda vikawa vinatoa picha ya nani ataanza nao katika mechi zake za kirafiki zinazotarajia kuanza kucheza hivi karibuni.
Kipa:
Haina ujanja, Ally Mustapha ‘Barthez’aliyesajiliwa akitokea Simba itabidi asubiri kwa Yaw Berko ambaye ameongeza mkataba wa mwaka mmoja kuichezea Yanga.
Walinzi:
Pembeni hasa kulia kuna utata, nahodha Shadrack Nsajigwa anapata upinzani mkali kutoka kwa Juma Abdul kutoka Mtibwa Sugar ambaye ameonyesha kiwango kizuri mazoezini. Bado inawezekana Ladislaus Mbogo kutoka Toto anaweza kucheza pembeni wakati Godfrey Taita pia yuko tayari.
Beki ya kushoto haina upinzani mkali zaidi na inaonekana ni Oscar Joshua na Stephano Mwasyika kama ilivyokuwa msimu uliopita.
Kwa beki ya kati, pia hakuna utata kwa kuwa waliokabidhiwa namba nne ni Kelvin Yondani, ‘kitasa’ au tano ni Nadir Haroub ‘Cannavaro’ na kiungo mkabaji anasimama Athumani Iddi ‘Chuji’.
Kiungo:
Katika hali ya kawaida, inaonekana kiungo mkongwe, Haruna Niyonzima atasogea mbele kucheza namba 10 na kumpisha kinda Frank Domayo aendeshe timu pale namba 8.
Lakini kazi ipo kiungo cha pembeni namba 7 ambako kuna Nizar Khalfan, Ally Shamte na kinda Simon Msuva.
Upande wa kushoto yaani namba 11 ndiko kuna shughuli ya kutoa machozi, jasho na ikibidi damu kati ya Said Bahanuzi aliyesajiliwa kutoka Mtibwa Sugar na Hamis Kiiza ambao hawapishani sana kiuwezo. Usisahau kuna Rashid Gumbo na Idrissa Rashid.
Ushambuliaji:
Hapa hakuna kazi kubwa, lazima Mohammed ‘Meddie’Kagere ambaye anatua kutoka Polisi Rwanda itabidi amiliki namba hiyo na kama atasaidiana na Myarwanda mwenzake, Niyonzima huenda ikawa poa zaidi. Hata hivyo, inabidi Myarwanda huyo afunge mabao, la sivyo namba yake itabaki kwa Jerry Tegete.

Chanzo: Global publishers