Simba walilia milioni 42 za ubingwa

Tweeted this Like this, be the first of your Friends

HII ndiyo Bongo bwana! Mabingwa wa Ligi Kuu ya Tanzania Bara msimu uliopita, Simba, mpaka leo hawajapewa fedha zao za kutwaa taji hilo ambazo ni shilingi milioni 42. Kinacholeta utata zaidi ni kitendo cha wadhamini ambao ni kampuni ya simu za mkononi ya Vodacom, kudai wameshawasilisha fedha hizo kwa Shirikisho la Soka Tanzania (TFF) ambalo nalo linadai halijapokea fedha kutoka kwa wadhamini. Simba kupitia kwa ofisa habari wao, Ezekiel Kamwaga, walizungumza na gazeti hili juzi na kulalamika kwamba kitendo kinachofanywa na TFF na wadhamini wa ligi kuu kuwacheleweshea fedha hizo si sahihi, kwa kuwa walitarajia kuzitumia wakati wa usajili. Kamwaga alilalama: “Ligi ilikuwa imepangwa na walijua wazi lini inaisha, hivyo ingekuwa rahisi kutoa fedha hizo mapema. Nashangaa kuona hadi sasa bado hatujapewa fedha hizo ili ziweze kutusaidia katika maandalizi ya michuano ya Kagame.” TFF kupitia kwa ofisa habari wao, Boniface Wambura, walisema wao wanasubiri wadhamini wa Ligi Kuu ya Tanzania Bara, Vodacom wapange siku maalum ya kutoa zawadi za washindi. Championi lilipodadisi kwa mmoja wa viongozi wa juu wa kampuni hiyo alisema: “Tumeshapanga hafla ambayo itafanyika Juni 30, mahali patakapotangazwa baadaye, lakini fedha zote tayari tulishazikabidhi kwa TFF siku nyingi na hatudaiwi.” Mbali na fedha hizo za Simba, Azam nao hawajapewa fedha zao za ushindi wa pili ambazo ni Sh milioni 17 na Yanga hawajapata milioni 11 kutokana na kuwa washindi wa tatu.

SOURCE: GOLOBAL PUBLISHER