Malasusa awataka wenye uwezo wasaidie jamii

Tweeted this Like this, be the first of your Friends

ASKOFU Mkuu wa Kanisa la Kiinjili la Kilutheri Tanzania (KKKT), Dk Alex Malasusa, amewataka wananchi kuacha tabia ya kujilimbikizia mali wakati wakishuhudia jamii ikiangamia  kwa kukosa huduma muhimu za afya, elimu na kadhalika,“Kuna watu wamejaliwa kuwa na kila kitu, wengi  hata mali zao hawazifahamu  wakati zinapopotea,  lakini hayo yanafanyika wakati kundi la jamii nyingine likiishi maisha magumu tena bila msaada,  wenye mali hawalitambui hilo,”  alisema.

Askofu Malasusa aliyasema hayo juzi jijini Dar es Salaam, alipokuwa akizungumza katika harambee ya kuchangia Mfuko wa kusomesha Wanafunzi wasiokuwa na Uwezo katika Shule ya Mtakatifu Joseph, iliyoko Mbezi Beach.
Alisema watu wanapaswa kugawana vile walivyopewa na Mwenyezi Mungu, ili kurahisisha maisha.
Mkuu huyo wa KKKT alisema ni jambo la kusikitisha kuona kwamba watu wenye mali hawako tayari kugawana na wasiokuwa ma mali kama Mwenyezi Mungu alivyofundisha.

“Mwenyezi Mungu ametufundisha kugawana kile tunachokipata, wale wenye uwezo wawagawie wale wasiokuwa nacho, lakini watu hawafanyi haya,” alisisitiza Dk Malasusa.

Kauli ya Askofu Malasusa  imekuja wakati kukiwa na habari kwamba  Kitengo cha Polisi cha Kimataifa (Interpol), kinachunguza Sh303.7 bilioni  zinazodaiwa kukutwa katika akaunti sita za Watanzania huko Uswisi.


Wiki iliyopita chanzo cha kuaminika kutoka ndani ya Interpol kilinukuliwa na gazeti dada la Mwananchi, The Citizen, kikisema baadhi ya wanasiasa na watu wengine nchini,  ndio wanahusika na ufisadi huo.
Inadaiwa kuwa fedha hizo ziliingizwa katika akaunti hizo na kampuni za uchimbaji mafuta na madini, nchini Tanzania.

Mapema  Katibu wa Mfuko wa kusomesha watoto wasiokuwa na uwezo,  Deus Valetine alisema jamii haina hamasa ya kuchangia maendeleo ya  sekta ya elimu.

Alisema badala yake, hamasa ya jamii iko katika kuchangia sherehe mbalimbali za anasa.

Valetine alisema utafiti uliofanywa na Taasisi ya Event Lab kwa mwezi mmoja, umebaini kuwa  zaidi ya watu 100,000  wananga wastani wa  Sh72 bilioni kila mwaka kwa ajili ya sherehe za harusi.

“Jamii ina uratibu wa kuchangia shughuli za jamii zilizolenga  zaidi katika anasa, huku ikishindwa  kuchangia  maendeleo ya sekta ya elimu,”

Kwa mujibu wa Valetine harambee  ya juzi, iliwezesha kukusanywa kwa Sh21 milioni .