KKT YAWASIHI MADAKTARI KUREJEA KAZINI

Tweeted this Like this, be the first of your Friends

ASKOFU wa Kanisa la Kiinjili la Kilutheri Tanzania (KKKT), Dayosisi ya Kaskazini ya Dk Martin Shao amewasihi madaktari waliogoma katika hospitali mbalimbali nchini ikiwamo KCMC kurejea kazini.

Hospitali ya Rufaa ya KCMC inayoendeshwa na Shirika la Kidini la Msamaria Mwema (GSF) la KKKT ni miongoni mwa hospitali zilizokumbwa na mgomo ulioanza Jumatatu wiki hii.

Akizungumza na gazeti hili jana, Askofu Shao alisema kuwa hata ikiwa madaktari hao wana hoja za msingi kiasi gani, zinaweza kupoteza ushawishi iwapo watatumia njia zisizo halali kushinikiza madai yao.
“Walitakiwa kuwa waungwana, walipaswa kujua wito wao kwa maana ya maisha ya wagonjwa kwanza maslahi baadaye. Njia bora ya kutatua migogoro ni mazungumzo, ”alisema Askofu Shao.

Askofu Shao alisema anazo taarifa za madaktari walio katika mafunzo kwa vitendo katika Hospitali hiyo ya Rufaa ya KCMC kuingia katika mgomo lakini, akasema suala lao linashughulikiwa na Serikali.

“Hili la madaktari walio mafunzoni tunashukuru linaendelea kutufanyiwa kazi na Serikali, hata mahakama imetoa amri yake, nawashukuru madaktari bingwa na wanaosomea ubingwa wako kazini,”alisema.

Hali ya utoaji huduma katika hospitali hiyo imezidi kuzorota baada ya madaktari wanaofikia 80 kugoma kurejea kazini huku taarifa zikieleza kuwa hadi jana walikuwa hawajarejea kazini.
Baadhi ya wagonjwa waliokuwa wamepewa rufaa kutoka hospitali mbalimbali kwenda KCMC, walijikuta wakirudishwa walikotoka kutokana na mgomo huo  unaoendelea.

Mbali na kutopokelewa kwa wagonjwa wapya wanaohitaji kulazwa, kliniki zote za wagonjwa wa kisukari, Ukimwi na waliofanyiwa operesheni zimefungwa rasmi kutoa huduma kwa wagonjwa.

Mgomo wa madaktari ulianza mwanzoni mwa wiki hii wakidai kutotekelezwa kwa madai yao ya maslahi bora kama walivyoahidiwa na Serikali kupitia vikao vya upatatishi, hata hivyo Serikali imepeleka suala hilo mahakama ya kazi kutafuta ufumbuzi ambapo leo itatoa tamko bungeni.