Burundi yampa tuzo Mwalimu Nyerere

Tweeted this Like this, be the first of your Friends

BURUNDI imemtunukia Baba wa Taifa, hayati Mwalimu Julius Nyerere, tuzo ya juu ambayo huitoa kwa watu mbalimbali kutokana na mchango wao katika kuleta uhuru na amani kwa taifa hilo.

Taarifa iliyotolewa na Kurugenzi ya Mawasiliano ya Rais-Ikulu jana, imeeleza kuwa Mwalimu Nyerere alitunukiwa Tuzo ya Taifa la Burundi (Order of the National Republic of Burundi),  katika kilele cha sherehe za kuadhimisha miaka 50 ya Uhuru wa Burundi zilizofanyika juzi.

Tuzo hiyo kwa Mwalimu Nyerere imepokelewa kwa niaba yake na Rais Jakaya Kikwete aliyekuwa mmoja wa viongozi sita wa nchi za nje waliohudhuria sherehe hizo.

Akitangaza utoaji tuzo hiyo, Rais wa Burundi Pierre Nkurunzinza alisema kuwa Burundi imeamua kumtunuku Mwalimu Nyerere kutokana na sababu mbili akitaja moja ni ushauri wake katika kuleta Uhuru wa Burundi kutoka kwa wakoloni wa Kibeligiji.

“Kwanza Mwalimu alikuwa mshauri muhimu sana wa mwanzilishi wa taifa letu, Louis Rwagasore na baadaye zilikuwa ni jitihada zake ambazo hatimaye zimeleta amani na utulivu, ambao tunaufurahia katika Burundi kwa sasa,”alisema.

Pamoja na Hayati Mwalimu, aliyekuwa Rais wa Afrika Kusini Nelson Mandela pia ametunukiwa tuzo hiyo.  Mandela alichukua nafasi ya Mwalimu Nyerere kama mpatanishi wa mgogoro wa Burundi kufuatia kifo cha Nyerere mwaka 1999.

Katika sherehe hizo, zilizoendelea mfululizo kwa saa saba tokea saa nne asubuhi hadi saa 11 jioni, Rais Kikwete aliungana na viongozi wenzake wa nchi sita na wawakilishi wa nchi nyingine nyingi duniani kuhudhuria kilele cha sherehe hizo za miaka 50 ya Uhuru wa Burundi ilioupata kutoka kwa wakoloni wa Kibelgiji Julai 2, mwaka 1962.

Mbali na Rais Kikwete marais wengine waliohudhuria ni Mwai Kibaki wa Kenya, Theodore Obing Nguema wa Equatorial Guinea, Joseph Kabila wa Jamhuri ya Kidemokrasia ya Congo (DRC) na Francois Bozize wa Jamhuri ya Afrika ya Kati.