Maelfu kuajiriwa kuziba nafasi zilizo wazi Serikalini

Tweeted this Like this, be the first of your Friends OFISI ya Rais, Sekretarieti ya Ajira katika Utumishi wa Umma inatarajia kufanya usaili wa watumishi 18,105 kujaza nafasi zilizo wazi katika Utumishi wa Umma.Nafasi hizi zipo katika Wizara na Idara zinazojitegemea ambazo ni 7,896, Sekretarieti za Mikoa nafasi 1,339, Halmashauri za Wilaya nafasi 7,892 pamoja na Taasisi na Wakala wa Serikali nafasi 978.

Waziri wa Nchi, Ofisi ya Rais – Manejimenti ya Utumishi wa Umma, Celina Kombani alisema jana Bungeni kuwa nafasi hizo ni nje ya nafasi zinazohusu Wizara ya Kilimo, Vyombo vya Ulinzi na Usalama, Elimu, Afya na Mifugo.

“Mpango wa mwaka 2012/2013, Sekretarieti ya Ajira inatarajia kutumia jumla ya Sh2.5 bilioni kwa ajili ya Matumizi ya Kawaida,” alisema Kombani.

Kwa upande wake, Ofisi ya Rais, Tume ya Utumishi wa Umma inatarajia kutumia Sh7.9 bilioni kwa ajili ya Matumizi ya Kawaida.

Alisema miongoni mwa kazi zilizopangwa kutekelezwa na tume hiyo kutoa uamuzi wa rufaa na malalamiko kadri yatakavyopokelewa, kufanya ukaguzi wa rasilimali watu kwa waajiri, mamlaka za ajira na nidhamu na kufuatilia uzingatiaji wa Sheria, Kanuni na Taratibu za usimamizi wa Rasilimali watu katika Utumishi wa Umma.

Alizitaja kazi nyingine kuwa ni kuendelea kuelimisha wadau kuhusu shughuli za tume kupitia njia mbalimbali kama vile vyombo vya habari, maonyesho na ziara.

Kombani pia alizungumzia Bodi ya Mishahara na Maslahi katika Utumishi wa Umma kwamba bodi hiyo itaendelea kufanya tafiti juu ya hali ya mishahara ikilinganishwa na hali halisi ya uchumi ili kutoa mapendekezo yanayohusiana na marekebisho ya mishahara na maslahi.

“Bodi hii itaendelea kukusanya, kulinganisha na kuchambua
taarifa zinazohusiana na masuala ya gharama za maisha, nyumba na vigezo vingine vinavyohusiana na malipo ya posho na maslahi mengine,” alisema Kombani na kuongeza:

“Kutoa mapendekezo juu ya kiwango cha mishahara, posho na maslahi kwa ajili ya mihimili mitatu ya Dola, kutoa ushauri kuhusu misingi ya miundo ya mishahara katika Utumishi wa Umma na kushauriana na Taasisi husika za Serikali juu ya bajeti ya kila mwaka kwa ajili ya malipo ya mishahara na maslahi ya Watumishi wa Umma”.