Maofisa sita kufikishwa kortini kwa ufisadi

Tweeted this Like this, be the first of your Friends Ofisa Uchumi wa Mkoa wa Tanga na Mweka Hazina wa Chuo cha VETA cha Jijini hapa  pamoja na Maofisa wengine wanne Waandamizi wa Wilaya ya Kilindi , wanatarajiwa kufikishwa Mahakamani 05 Julai 2012 kujibu tuhuma mbalimbali za ubadhirifu zinazowakabili.

Akizungumza na Gazeti hili  jana mmoja wa Maofisa  Waandamizi wa Taasisi ya Kuzuia na Kupambana na Rushwa (Takukuru) wilayani Kilindi Mkoa wa Tanga, ambaye aliomba kuhifadhiwa jina lake, alisema watumishi hao wanatuhumiwa kwa makosa mbalimbali.

Katika kesi hiyo Namba: ECC. 05/2012, Ofisa huyo alitaja makosa hayo kuwa ni matumizi mabaya ya nyaraka za Serikali, kumdanganya mwajiri wao, uhujumu uchumi, kughushi nyaraka na kuisababishia serikali hasara.

Aliwataja maofisa hao kuwa ni pamoja na Annunsiata Anselm Lyimo ambaye alikuwa Mkurugenzi Mtendaji wa Halmashauri ya Wilaya ya Kilindi ambaye sasa ni Mchumi katika Ofisi ya Mkuu wa Mkoa wa Tanga na Benedict Philip Mburi, Mhasibu wa Veta Tanga.

Wengine ni Rowland Michael Lema, Ofisa Misitu wa Halmashauri ya wilaya ya kilindi, Bakari Ali Mnaguzi, Ofisa Misitu Msaidizi wa Halmashauri ya Wilaya ya Kilindi, Waziri Ali, Mhasibu wa Mradi wa PFM Halmashauri ya Wilaya ya Kilindi na Eniyoye Chezue Mrinji, Afisa Misitu Hifadhi Wilaya ya kilindi.


"Tarehe 21/06/2012 kesi ilifunguliwa mahakamani ambapo washitakiwa wanne tu walifika mahakamani . TAKUKURU Wilaya ya Klindi inafanya jitihada ya kuhakikisha watuhumiwa wote wanafikishwa katika Mahakama ya Wilaya ya Handeni tarehe 05/07/2012, kwa vile hapa Kilindi hatuna Mahakama ya Wilaya tunategemea ile ya Handeni," alisema Ofisa huyo.

Alisema sababu za tuhuma hizo ni uendeshaji mbaya wa makosa yaliyotajwa wakati wa kutekeleza Mradi wa usomamizi Shirikishi wa Misitu (PFM) wa Halmashauri ya Wilaya ya Kilindi mwaka 2006.

Juhudi za kumpata Kamanda wa Takukuru wa Mkoa wa Tanga ili kuzungumzia suala hilo, hazikuweza kufanikiwa kwa kuwa hakupatikana.
 
Tukio hilo la viongozi hao kukamatwa limekuja siku chache baada ya Ofisa wa Misitu hifadhi wilayani Handeni, Rashidi Kiure, kufikishwa katika Mahakama hiyo ya Wilaya ya Handeni na Takukuru wilayani humo, kwa tuhuma za ubadhirifu wa mali ya umma.