StatsCrop - Free website analyzer!
Dk Nchimbi alitoa kauli hiyo katika hotuba yake iliyosomwa na Katibu wa Wizara hiyo, Mbarak Abdulwakil wakati wa uzinduzi wa Bodi ya Ushauri ya Vyuo vya Polisi nchini, kuwa hivi sasa watu wanatumia mitandao katika wizi ambao unaligharimu taifa.
Alisema maofisa wa Jeshi la Polisi wanapaswa kujifunza na kujiimarisha katika ujuzi wa mbinu wanazotumia wahalifu, ili kuwanyima nafasi ya kutenda uhalifu.
“Matumizi ya mitandao yamevuka mipaka na kuanza kuwa haramu na hivyo kuhitaji utaalamu wa hali ya juu kubaini uhalifu na wahalifu,” alisema Abdulwakil na kuongeza:
Kuna kasi kubwa ya matumizi ya fedha chafu, kuingiliwa kwa mifumo ya kibenki, mbinu za kuhujumu mifumo ya kodi, matumizi ya teknolojia kukiuka sheria na kutenda makosa mbalimbali ya jinai.
“Kwa mantiki hiyo mahitaji ya kuwa na Jeshi la Polisi ambalo ni la kisasa, lenye weledi na ambalo lipo karibu na wananchi hayakwepeki,” alisema Abdulwakil.
Kwa upande wake Mkuu wa Jeshi la Polisi (IGP) Said Mwema alisema kupitia bodi hiyo itakayokuwa ikimshauri jinsi ya kuboresha vyuo vya jeshi hilo ili kuwa na maofisa walioelimika na kukabiliana na uhalifu kwa ufanisi.
“Ukishakuwa na askari aliyeelimika vizuri nina hakika hata uwajibikaji wake kazini hususan kuwatumikia wananchi na Jeshi la Polisi, utakuwa wenye weledi mkubwa,” alisema Mwema na kuongeza:
Askari anatakiwa kuhakikisha anajua mapema tukio kabla ya kutokea, na hili litafanikiwa tukiwashirikisha wananchi kwa ukaribu na hilo, ndilo litakiwa mafanikio ya kupambana na wahalifu.
Bodi iliyozinduliwa ina wajumbe 18 kutoka Tanzania bara na Zanzibar kutoka ndani na nje ya Jeshi la Polisi, chini ya uenyekiti wa Profesa Florens Luoga wa Chuo Kikuu cha Dar es Salaam.
Profesa Luoga alisema wataitumia nafasi hiyo kumshauri IGP Mwema ili kulifanya jeshi hilo kuwajibika ipasavyo.
“Tunaelewa changamoto zilizopo na tutahakikisha tunashirikiana ili kuziondoa na kufikia malengo ya kuwa jeshi imara na lenye weledi,” alisema Profesa Luoga.
SOURCE: MWANANCHI
