Serikali yakiri kuwapo mbolea feki

Tweeted this Like this, be the first of your Friends SERIKALI imekiri kuwa wakulima wengi wamekuwa wakipatiwa mbolea ambayo haina kiwango na ubora  jambo linalopunguza ufanisi katika utendaji kazi.

Hayo yalibainishwa jana na Naibu Waziri wa Kilimo, Chakula na Ushirika, Adam Malima ambaye alisema kuwa Serikali inazo taarifa za wakulima kununua mbolea isiyo na ubia na kuitumia mashambani mwao.

Malima alikuwa kijibu swali la Jenista Mhagama (Peramiho-CCM) aliyetaka  kujua kama Serikali ina taarifa kuwa wakulima wananunua mbolea ambazo hazina ubora kabisa.

Mhagama pia alitaka kujua ni kwa nini sheria iliyounda TFC isibadilishwe ili chombo hiki sasa kitafute wadau wa kuanzisha kiwanda cha mbolea na akataka kiwanda hicho kijengwe mkoani Mtwara.
 Naibu Waziri alisema Kampuni ya TFC imeendelea kuwa ni kampuni ya umma chini ya Serikali na inafanya kazi ya kusambaza mbolea yenye ubora na wakati.

Malima alisema kufuatia uamuzi wa kufunga kiwanda cha uzalishaji wa mbolea kilichokuwa Tanga mwaka 1991, kitengo cha mauzo cha Kampuni ya Mbolea Tanzania (TFC) Dar es Salaam, kiliundwa upya na kuwa kampuni ya umma.

“Hii ilitokana na uwezo mkubwa wa TFC katika miundombinu ya usambazaji, wataalamu wenye uzoefu na imani kubwa iliyonayo kwa wakulima na kwa wakati, Serikali iliamua pia kutobinafsisha mali zilizokuwa za Kiwanda cha TFC za usambazaji mbolea,’’alisema Malima.

Kuhusu uanzishwa wa kiwanda, Naibu Waziri alisema juhudi hizo zinaendelea na kwamba upo uwezekano mkubwa wa kuanzishwa kiwanda cha mbolea kwa kutumia gesi asili katika siku za usoni.

Alisema kwa mantiki hiyo na kwa ilivyo sasa ni lazima Kampuni ya TFC ikaendelea na jukumu la kufanya kazi ya kusambaza mbolea nchini hasa sehemu ambazo hazifikiki kirahisi ili kuhakikisha wakulima wanapata mbolea kwa wakati.