WAFANYAKAZI MUHIMBILI KUPANGULIWA

Tweeted this Like this, be the first of your Friends

WAZIRI wa Nchi, Ofisi ya Rais Menejimenti ya Utumishi wa Umma, Celina Kombani amesema Serikali inatarajia kufanya tathmini ya utendaji na majukumu ya kazi kwa watumishi wa kada za afya ikiwamo Hospitali ya Taifa  ya Muhimbili.

 Kombani alisema Tume ya Utumishi wa Umma itafanya hivyo ili kupunguza mlundikano wa watu hasa wauguzi  katika eneo moja jambo ambalo linachochea kukiukwa kwa maadili.

“Kumekuwapo na ongezeko la watumishi katika eneo moja, hili husababisha utendaji mbovu na kukua kwa migogoro kwa hiyo tutafanya tathmini ya utendaji wa watumishi hao na kujua majukumu yao kisha kupangua na kupunguza idadi katika eneo moja,” alisema Kombani.

Kombani alisema hayo alipokuwa akitoa majibu ya hotuba yake kwa wachangiaji ambapo awali, Mbunge wa Viti Maalumu (CCM), Rosweeter Kasikila alihoji kuhusu wauguzi kuwa na kurugenzi maalumu kutokana na wingi wao.

Aidha Kombani alisema hoja ya kuwaongezea watumishi wa kada ya afya na elimu asilimia 50 ya posho kwa ajili ya mazingira magumu ya kazi, haitawezekana kwa sababu kila kada inafanya kazi katika mazingira magumu kulingana na eneo waliopo.

“Suala la asilimia 50 ya fedha kwa ajili ya mazingira magumu ni la watu wote, hatuwezi kuzipa kada hizi mbili tu kwa sababu  hata kada nyingine nazo zinafanya kazi katika mazingira magumu,” alisema.
Kombani alitoa mfano wa jinsi mbunge wa Nkasi Kaskazini (CCM), Ally Keissy ambaye hutumia mitumbwi kufika katika maeneo ya jimboni mwake na kusema kuwa, hayo ni baadhi ya mazingira magumu ya kazi.

 Alisema Serikali imeshafanya tathmini ya jinsi ya kuwapunguzia adha ya mazingira magumu watumishi wake  wa kada zote ikiwamo kuwapa motisha.