Dogo Janja atua Watanashati *Sasa kuigiza filamu

Tweeted this Like this, be the first of your Friends

KUMPIGA teke chura ni kumuongezea mwendo. msemo huu huwenda ukawa ni tafsiri kwa kile kilichomkuta msanii maarufu wa muziki wa kizazi kipya nchini, Dogo Janja.

Wakati kila mmoja akisikitika kuwa ndoto za Dogo Janja zingepotea baada ya kutimulika kutoka katika kundi la Tip Top Connection, muda mfupi baadaye msanii huyu alibahatika kupata mfadhili mwingine.

Baada ya kurudishwa kwa basi sasa amerudi tena kwa ndege, huku safari hii akisaini mkataba mnono katika kundi la Watanashati linaloongozwa na Ostaz Juma.

Dogo Janja alipokelewa katika uwanja wa ndege wa kimataifa wa Julius Nyerere jijini wikiendi iliyopita huku kukiwa na wadau lukuki wa muziki wa kizazi kipya.

Msanii huyo ambaye alikiri kufurahishwa na  mapokezi, alisisitiza kwamba japo aliapa hatorudi  Dar es Salaam,  wazazi wake wamemsihi  arudi aendelee na masomo kitu ambacho amekikubali kwa roho safi.

"Unajua japokuwa watu wengi wamesema nilikosea, lakini hawajui lolote ninayejua ni mimi mtendewa" anasema Dogo Janja na kuongeza "wengi waliamini yaliyosemwa na Tip Top kuwa mimi nilikuwa mtoro, mkaidi, lakini mimi nasema kama kweli ningekuwa na vitendo hivyo wasingetokea watu wengine na kunifadhili" anasema Dogo Janja.

Japokuwa mkataba wa makubaliano ya ufadhili huo na kampuni ya Watanashati u tayari Janja amesema bado hajasaini mkataba huo.

"Kuna watu wangu bado nawasubiri watakapouona hao basi kila kitu kitakwenda kama tulivyopanga, kwani kila kitu lazima ukipitie kabla ya kukipitisha na hiyo ndiyo mipango.

"Nimebadili mawazo na sasa nitasoma Dar es salaam katika shule nzuri ambayo nimeahidiwa na Ostaz Juma meneja wa Watanashati" anasema huku akibainisha kuwa katika makubaliano yao ya shule, atakuwa akipelekwa na kurudishwa nyumbani kwa gari, anachohitaji pia ni kusoma kwenye shule binafsi nzuri na pia swala lake la muziki kuzingatiwa.

Licha ya kuyaweka mezani hayo, Dogo Janja pia amesema katika mkataba wake atakaosaini suala la uigizaji pia lipo na anampango wa kuifanya kazi hiyo kwani ni kazi anayoipenda pia.

“Sasa hivi nitakua naigiza na filamu pia na kina Kitale manake tuko nao kwenye kundi moja la Watanashati” anasema.