Tume:Sheria ya Mabadiliko ya Katiba kurekebishwa kwa awamu

Tweeted this Like this, be the first of your Friends
TUME ya Mabadiliko ya  Katiba imesema kuwa itafanya marekebisho ya Sheria ya Mabadiliko ya Katiba kwa awamu, ili kutoa ufafanuzi wa jinsi ya  upatikanaji wa Viongozi na Wawakilishi wa wananchi katika Bunge la Katiba.

Vifungu  vitakavyofanyiwa marekebisho na tume hiyo inayoongozwa na Jaji Joseph Warioba ni pamoja na kifungu cha 22 na kifungu kidogo c, cha Sheria ya Mabadiliko ya Katiba.Akizungumza katika hafla iliyojadili Sheria ya mabadiliko ya Katiba iliyoandaliwa na Umoja wa Wanafunzi wa Vyuo Vikuu (Tahiliso), Naibu Katibu wa Tume hiyo Casmir Kyuki alibainisha hayo akisema marekebisho hayo yatafanyika kwa awamu na kwamba hii itakuwa ni awamu ya pili kufanyika.

Alisema licha ya kuwepo kwa Sheria ya Mabadiliko ya Katiba inayoeleza mambo mbalimbali yanayohusu mabadiliko ya sheria hiyo, baadhi ya vifungu vitafanyiwa marekebisho ili kutoa ufafanuzi zaidi kwa wananchi.

"Katika sheria hii kifungu cha 22 pamoja na  kifungu kidogo cha C, vitafanyiwa marekebisho kwa awamu,  ili kusaidia kutoa ufafanuzi kwa wananchi, kutambua jinsi viongozi na wawakilishi wa taasisi mbalimbali watakavyotoa wawakilishi katika Bunge la Katiba," alisema Kyuki na kuongeza:

 "Watu wanaweza kuuliza maswali kwa jinsi gani watashiriki katika Bunge la Katiba kwani  Sheria ya Mabadiliko ya Katiba kifungu cha 22 na kifungu kidogo C vimeeleza, lakini marekebisho yatafanyika kuwezesha kutoa ufafanuzi zaidi katika kipengele hicho."

Akizungumzia ushirikishwaji wa Makundi Maalumu katika mchakato wa upatikanaji wa Katiba mpya, mtoa mada kutoka tume hiyo Said Nzori alisema kuwa makundi hayo yanawakilishwa na viongozi wake kwa kuwa wao pia wanakutana katika vyama vyao na kwamba wao pia wanapaswa kushiriki katika mchakato huo wa utoaji maoni.

Alisema kuna taasisi na vyombo mbalimbali vya watu walio katika makundi maalumu nao hukutana na kujadili masuala ya upatikanaji wa Katipa mpya na kutokana na sheria hizo watashiriki kupitia wawakilishi wao.

"Tume inachoweza kusema ni kwamba uamuzi unaotolewa na watu walio katika makundi maalumu wanapokutana yafikishwe kwenye Tume ya Marekebisho ya Katiba kupitia wawakilishi wa vyama vyao au taasisi ili yafanyiwe kazi,"alisema Nzori.

Katika mjadala huo washiriki kutoka vyo vikuu mbalimbali walisema ni vyema wafugaji na wakulima wakapewa pia elimu ili waweze kutoa maoni yao ipasavyo.

Akifunga kongamano hilo,  Mwenyekiti wa Tume hiyo Jaji Mstaafu  Joseph Warioba, alisema wasomi nchini wanapaswa kuwa mstari wa mbele kuhamaisha wananchi kushiriki kutoa maoni ya Katiba mpya.

Alisema tume yake itahakikisha wananchi wote wanapata nafasi ya kushiriki kikamilifu, kutoa maoni yao na kwamba hawawezi kukubali kushindwa kufanikisha kazi waliyopewa.

"Wasomi mnatakiwa kuwa mastari wa mbele kuhakikisha mnahamasisha  wananchi wote kushiri kutoa maoni yenu  na tume itajitahidi kufanikisha kazi hiyo kwa kupitia maeneo yote nchini ili wanachi washiriki kikamilifu," alisema Jaji Warioba.