BASI LAPARANIA MIFUGO NA KUUA NG'OMBE 19,WAMASAI WAFUNGA BARABARA

Tweeted this Like this, be the first of your Friends

Mmiliki wa ng'ombe,Mzee Saikon Sanai akiangalia ngombe wake kwa masikitiko baada ya kugongwa na basi la AM Coach na kufa.

Na Woinde Shizza,Monduli

KUNDI la wafugaji jamii ya kimasai wenye hasira kali wakazi wa kijiji cha Losimingori kata ya Lepunko wilaya ya Monduli mkoani Arusha,wamejikusanya na kufunga barabara ya kutoka Arusha kwenda Singida na Dodoma kufuatia basi la AM Coach kuparamia mifugo yao na kuua ng’ombe 19 papo hapo.

Kwa mujibu Afisa mtendaji wa kijiji hicho,Shongon Leswaki Mayon tukio hilo limetokea jana katika eneo la Nanja kijiji cha Losimingori majira ya saa2.30 asubuhi na kwamba ng’ombe waliogongwa wametambulika kuwa ni mali ya mfugaji, Saikon Sanai (78)mkaazi wa kijiji cha Losimingori .

Mtendaji huyo alieleza kuwa basi hilo lenye namba za usajiri T 316 AZR lilikuwa likiendeshwa na dereva aliyetambulika kwa jina moja la Abdalah likitokea jijini Arusha na kuelekea mkoani Mwanza.

 

Alisema kuwa dereva wa basi hilo aliparamia mifugo hiyo na kuua ng’ombe 17 wakiwemo punda wawili bila kujali tahadhari ya alama za vibao barabarani vinavyoonyesha kuwa eneo hilo mifugo inaruhusiwa kuvuka .

Baada ya tukio hilo dereva wa basi hilo hakusimama hadi alipojisalimisha katika kituo cha polisi makuyuni ambapo gari hilo limezuiwa na polisi kwa ajili ya uchunguzi zaidi.

Wafugaji hao wakiwa na silaha mbalimbali za jadi walijikusanya na kupanga mawe na magogo barabarani na kuzuia magari yatokayo jijini Arusha na Singida kwa muda wa zaidi ya masaa matatu hadi alipofika mkuu wa wilaya ya Monduli Jowika Kasunga na kuwasihi kutojichukulia sheria mkononi.

Kasunga aliwasihi wafugaji hao kufuata sheria ikiwemo kwenda polisi kufungua jalada la madai katika kituo kidogo cha polisi makuyuni ,ambapo wananchi hao walijiteua akiwemo mmiliki wa ng’ombe waliouawa na kwenda kituopni hapo.

Kwa mujibu wa mmiliki huyo ng’ombe hao wanathamani ya zaidi ya shilingi 45,000 na wanachodai mmiliki wa basi hilo ajitokeze awalipe mifugo yao kwani dereva wake aligonga kwa maksudi ng’ombe hao akiwa kwenye mwendo kasi.

Katika hatua nyingine wafugaji hao wameapa kuyazuia magari yote ya AM coach kutopita katika eneo hilo hadi wapate mwafaka wa malipo ya mifugo yao.

Kamanda wa polisi mkoani Arusha ,Liberatus Sabasi amethibitisha kutokea kwa tukio hilo na kueleza kuwa polisi wanafanya uchunguzi juu ya tukio hilo na kuwasihi wafugahi hao kuendelea kuwa watulivu wakati jeshi la polisi likifanya uchunguzi.