WAKARI TUKILALAMIKIA UKATA: Serikali ilitumia Sh 27 bilioni kwa sherehe za Uhuru

Tweeted this Like this, be the first of your Friends NAIBU Waziri wa Nchi, Ofisi ya Waziri Mkuu, Tawala za Mikoa, Aggrey Mwanri amesema maadhimisho ya miaka 50 ya Uhuru wa Tanzania Bara yaliigharimu Serikali kiasi cha Sh27.5 bilioni.
 Mwanri alisema kiasi hicho kilipunguzwa baada ya kubana matumizi ambapo awali bajeti ya maadhimisho hayo ilikuwa Sh30 bilioni kwa matumizi ya wizara , mikoa, mamlaka za Serikali za mitaa na taasisi mbalimbali.

Mwanri alikuwa akijibu swali la Mbunge  wa Wawi, (CUF) Hamad Rashid Mohamed,  aliyehoji kuhusu gharama za  maadhimisho ya miaka 50 ya uhuru na uwezekano wa Serikali kufanya sherehe moja ili kubana matumizi kwa ajili ya matumizi mengine ya maendeleo kama madawati na vifaa vya elimu.

Mwanri alisema kumbukumbu hii ni ya muhimu kwa taifa kwa faida ya Watanzania hasa katika kukijengea uzalendo kizazi cha sasa ambapo hakikuwapo wakati uhuru uliopatikana.

“Maadhimisho haya ya kihistoria yameisaidia nchi yetu kujitangaza nje ya nchi na kujiletea sifa kubwa na pia kuvutia wawekezaji na watalii,” alisema Mwanri.

Aidha Mwanri alisema ilikuwa ni jambo la msingi kwa taifa kufanya maadhimisho hayo kwa sababu ya umuhimu wa historia katika taifa lolote.

“Sherehe zilifanyika katika maeneo yote hayo ili kuwafanya Watanzania waijue nchi yao ilipotoka,”

Waziri huyo aliongeza kuwa, nchi isiyo na historia ni kama imekufa kwani watoto wa sasa wanatakiwa wajue historia yao.